Першага верасня зала мастацтваў цэнтральнай бібліятэкі імя У.Маякоўскага была запоўнена вучнямі 4-5 класаў, якія прыйшлі на краязнаўчы ўрок-сустрэчу Галіны Сташкевіч – кіраўніка літаратурна-музычнага аб’яднання «Крылы», наваполацкай пісьменніцы.

Краязнаўчы ўрок Галіна Сяргееўна прысвяціла Году міра і стварэння ў Беларусі, 65-годдзю Наваполацка і Дню ведаў, з якім павіншавала вучняў і іх настаўнікаў. Размова ішла на дзвюх дзяржаўных мовах – беларускай і рускай, на якіх і піша свае творы Сташкевіч Г. Звярнула яна ўвагу на кніжныя выставы, прысвечаныя юбілейнаму Наваполацку – маладзёжнай сталіцы 2023 года, а таксама на літаратурныя выданні наваполацкіх аўтараў. Асаблівую ўвагу атрымаў альбом да 65-годдзя Наваполацка.

Беларусі была прысвечана мастацкая замалёўка «Прызнанне ў любові» Галіны Сташкевіч. На тэму экалагічна-духоўнага выхавання прагучала апавяданне «Смерць велікана», з якім яна прыйшла ў літаратуру. Гэта апавяданне, як і шэраг іншых твораў аўтара, было прадстаўлена ў рэспубліканскім перыядычным выданні «Літаратура і мастацтва». Пісьменніца не абыйшла ўвагай і тэму Вялікай Айчыннай вайны. Дзеці з цікаўнасцю паслухалі яе верш-рэквіем «Кожны чацвёрты, трэці, другі…» і патрыятычную замалёўку «Солдат войны».

Слаўным гарадам Полацкай зямлі – Полацку і Наваполацку былі прысвечаны творы «Встреча с Полоцком», «Шчодры падарунак», «Песня Двины». Гучалі і лірыка-пейзажныя замалёўкі з мастацкага цыкла «Музыка Жыцця, альбо Адвечны гімн Прыродзе», сярод іх замалёўка «Праздную Осень!», якой была завершана сустрэча.

Усё мерапрыемства было накіравана на выхаванне такіх пачуццяў, як любоў да роднай Беларусі і беражлівыя адносіны да яе спадчыны.