У гонар Сусветнага дня паэзіі 21 сакавіка ў зале мастацтваў цэнтральнай бібліятэкі імя У.Маякоўскага літаратурна-музычнае аб’яднанне “Крылы” ладзіла вечарыну-канцэрт “Паэтычная мазаіка”, якую на працягу гадзіны складалі вершы і песні на самыя розныя хвалюючыя тэмы. Кіраўнік аб’яднання “Крылы” Галіна Сташкевіч адкрыла вечарыну прыгожым лірычным творам “Вершы ствараюцца сэрцам…” паэта-першабудаўніка Наваполацка Юрася Касцюка. Яна таксама зрабіла агляд выставы кніжных выданняў паэтаў-“крылаўцаў”.

Сваімі вершамі і байкай асаблівы каларынт унесла ў паэтычную мазаіку вечарыны паэтэса Ларыса Сакарэнка. У выкананні Алены Штукінай прагучалі дзве лірычныя песні, напісаныя на вершы Ларысы Сакарэнка, а таксама песня на верш “Мне б толькі ўспомніць…” вядомага паэта Навума Гальпяровіча. Да паэта першай велічыны Аляксандара Пушкіна звярнуўся Аляксандра Ігонін, прачытаўшы яго верш “Признание”. Пад музычны акампанемент Валянціны Пакрапіўнай у яго выкананні прагучала і папулярная эстрадная песня “Это было недавно, это было давно” Міхаіла Матусоўскага і Веніяміна Баснера. Цудоўныя вершы паэтэсы-першабудаўніка Нафтаграда Ніны Дзянісавай, якая зусім нядаўна адзначыла 98-ю вясну свайго жыцця, чытала Валянціна Пакрапіўная. Добрым лірычным настроем напоўнілі паэтычную мазаіку вершы Галіны Сташкевіч і Веры Урбан. Упрыгожылі вечарыну вершы паэта і былога прафесара ПДУ Венядзікта Грынёва, якія прагучалі ў выкананні яго жонкі і музы Феніі Грынёвай.

Паэтэса, бард Людміла Мяхедка напоўніла новым гучаннем паэтычную мазаіку, выканаўшы аўтарскую песню на верш “Гітара”, а таксама песні на вершы Эдуарда Фёдарава і Аляксандра Шыпілы. З вялікай цікаўнасцю слухалі ў яе выкананні песню “Свечка гарэла на стале” на верш Барыса Пастэрнака ў перакладзе на беларускую мову Рыгора Барадуліна.

Заключным штрыхом паэтычнай мазаікі стаў верш “Поэзия, шагни на улицы…” Аляксандра Шыпілы, які прачытала Галіна Сташкевіч. У камернай сяброўскай атмасферы адбылося сапраўднае свята яе вялікасці Паэзіі, пра якое больш падрабязна на старонцы літаратурна-музычнага аб’яднання “Крылы” (Facebook).